الجمعة، 9 ديسمبر، 2011

سواقين التاكاسى..(حوار مع سواق تاكسى ,وافراد من الشعب )..جزء 1

سواقين التاكاسى..جزء 1
بصراحه مغلطتش لما قولت ان سواقين التاكاسى هم اكتر الناس بيكرهوا الثوره..! بصراحه كمان انا مكتبتش الموضوع ده من فراغ ,لا انا قابلت سواقين كتير كلهم نفس الموقف,,برضه مش عارفه اذا كان الموضوع  ده ينطبق على باقى السواقين ولا لآ."مع احترامى" للجميع انا كتبت الموضوع ده من خلال المحادثات الى صادفتها وده الى خلانى اكتب الموضوع على جزئين او يمكن اكتر..!
الموضوع بيبدأ معايا من امبارح مع العلم انى مش امبارح بس صادف المحادثات دى بس يمكن ده اكتر واحد يستفزنى اوى,,,وانا راجعه من الدرس امبارح ركبت مع سواق تاكسى وبعد ما مشينا شويه لقيته ركب معايا سيدتان كانوا طريقهم نفس طريق بيتى ومعاهم اطفالهم ولد و بنت صغيرين كان فيهم واحده(منقبه)وواحده(محجبه),و طبيعى فى الطريق ان احنا بنعدى على ميدان الممر وكان "حزب النور" بيعملة كشك كده صغير و حاطط"دى جى"عشان بيعمل خدمه اعرف لجنتك..!(مش موضوعنا) المهم الست( المنقبه) بتقول "ايه ده هما هيعملوا مليونيه بكره ولا ايه" ردت عليها الست (المحجبه)"ربنا يهدهم بقى" رد (السواق)"يارب دول وقفوا حالنا"..بصراحه انا مرضتش ارد قولت لما يخلصوا كلام خالص..قامت الست (المنقبه) "الاسعار بقت نار والواحد بقى ماشى خايف من البلطجيه",,يرد (السواق)"دا انا كنت بجيب جركن الزيت المعفن ب30جنيه دلوقتى بقيت بيجيو ب60جنيه.وطبعا لازم السيده (المحجبه)تقول "اه جوزى عنده عربيه و بجيبو ب60جنيه برضه"..!واحنا بقى ماشين كان فى عربيه قدمنا حاطه على زجاجها بوستر(حزب النور) قام (السواق)قايل "ليه ميعملوش حزب للحمار..!" "ده الحمار اكتر واحد بيتعب فى البلد بيشيل على ظهره وماشى,ده حتى سعد الصغير غناله :بحبك يا حمار)" قولت فى سرى "تافه"..ام مكمل"ولا حزب للقفا ده حتى القفا ده مشهور عند المصرين ومحمود عبداعزيز غناله"آه يا قفا"...( كنت بقاوم وكان شكلى هانط من التاكسى) قامت الست (المحجبه) قالت"ناس فاضيه والله انا مش عارفه بينزلوا ليه.؟!"...بصراحه بقى جبت اخرى و قولتلها(نزلوا عشان يجيبوا حقك,,عشان ينقذوا ثورتك,,انتى مش خايفه عالبلد,,انتى شايفه ان الثوره نجحت..قال (السواق)"كفايه ان حسنى مبارك مشى" قولتله "اه مشى لكن نظامه لسه موجود,,لا المصابين اتعالجوا ولا الشهداء خدوا حقهم ولا حسنى و اعوانه اتحاكموا" قالى(السواق)"لا حصل انا راجل موظف كنت بقبض بالميت 500جنيه لكن دلوقتى الحمدلله بقبض800جنيه "قولتله الحمدلله لكن هل ده انطبق على البلد كلها..طبعا لا,لسه عندك ناس بتشحت وناس بتاكل من الزباله"ولما قربنا من البيت قولتلهم"انزلوا مره الميدان وانتوا تعرفوا الناس دى بتنزل ليه" ونزلت وانا بقول"لكى الله يا مصر".
ملحوظه"الحوار ده كان يوم الخميس8/12/2011
Amna.W.Hassan

الجمعة، 18 نوفمبر، 2011

الى اين؟

بينما تستعد البلاد لاجراء الانتخابات البرلمانية التى من المقرر ان تبدأ في مصر يوم 18 نوفمبر/تشرين الثاني الجاري، وجدت مختلف التيارات السياسية نفسها وسط جدل كبير وانقسامات فى الرؤى والمواقف من وثيقة المبادئ الدستورية التى جاءت بها حكومة عصام شرف الانتقالية بالدعوة للحفاظ على مدنية الدولة وهذه يعكس الخوف من التيارات الاسلاميه وشعور المجلس العسكرى بقوتها وحضورها فى الشارع وقلق الاوساط الليبراليه من تحكم الاسلاميين فى المجالس التشريعيه وبالتالى  على شكل الدستور القادم للبلاد. 
النقطه الثانيه المثيره هى فلول الحزب الوطنى المنحل والحديث عن مدى  احقيتهم فى الترشيح من عدمه  وهذا الحديث اصبح فى الشارع المصرى وساحات القضاء بين مؤيد ومعارض وحكم بعزل السياسى واخر بتمكين .
النقطه الثالثه والاجابيه فى الانتخابات هى الحكم الصادر بحق المصريين بخارج الادلاء بصواتهم فى الانتخابات كان مُعظم هؤلاء المصريين قد فقدوا الأمل فى حدوث تغيير فى وطنهم الأم، بعد أن رأوا تمرّس نظام المخلوع بتدمير البدائل، والبقاء فى السُلطة، وسدّ كل منافذ التغيير  كذلك ضاعف من يأس المصريين فى الخارج حول مُستقبل الوطن الأم احساسهم بان دولتهم وسفاراتهم قد نسيت او تناست هذه الاعداد والتى من الصعب اغفال اعدادهم والتى يتراوح بين 6 مليون مصرى فى الخارج  ولكن بعد الثوره بدأ  المغتربين بلاهتمام هم وليس الدوله من تحرك اولا ومطالبتهم بحقهم فى التصويت ولشعورهم بانهم جزء من الشعب المصرى مع تباعد المسافات وامالهم فى الرجوع لمصر افضل من التى تروكها .
واخيرا وعلى بعد ايام قليله من الانتخابات نأمل ان تكون  الكلمه الفاصله للشعب المصرى فى اختيار مستقبله بين دوله اسلاميه  او دوله مدنيه يحكمها دستور عادل الكل يلتزم به ونحن فى انتظار الصندوق الزجاجى هو الذى يحديد مستقبل مصر الى اين ؟ 
 Egy_HAM.

الجمعة، 28 أكتوبر، 2011

"حكاية شعب"

شعب اتولد جوة البلد
فيها شرب فيها عطش فيها اتجلد
شعب ثار شعب اتنكس
شعب انتصر شغب اتخرس
ثلاث عقود ياخد وعود
صبر كتير لما اتخنق قام وانفجر
الظلم زاد هز البلاد الشعب ثار
اتهان كتير نزل التحرير
الشعب ثار هتف وقال
الظلم لأ دا العدل حق
لأ مش هنام لأ مش تمام اسقاط نظام
كرامتى فين اشكى لمين
عايش حزين اتهان كتير جوة الكمين
وقف خلاص والوقفة بجد
أرواح وهتاف نظام اتهد
الوعى زاد والحق عاد
وقف يكمل ضد الفساد
ازاى اعيش اعلام مفيش
كدب وتضليل تلفيق تزوير
يالى ساكت قوم وشارك
حق بلدك هو حقك
يلاقوم ارمى الهموم
اكتب تاريخ بلدك بإيدك
وبكره يبقى اليوم ده عيدك
الثورة مش فى يوم وليلة مصر دى بلد ثقيلة
حواليك كتير مستنين
قولهم هتبقى مين
هى دى حكايتك انت
لسه واقف زى ما انت
يلاقوم يا شعب مصر
عرفتهم معنى الحضارة
شوف تاريخك والعمارة
دلوقتى قاعد جوة حارة
علموك تشرب سيجارة
يلا قوم بنبنى مصر يلا قوم بنبنى مصر

Amna.w.Hassan

الجمعة، 21 أكتوبر، 2011

ليبا بعد القذافى..!

ليبا بعد القذافى..!
هل ستكون نهايه القذافى بدايه العهد الجديد لليبيا الحره؟!
اول مهمه من المفترض ان يقوم بها المجلس الانتقالى الليبى بعد مقتل "القذافى" هى السيطره على فوضى السلاح فى الشارع الليبى,وتثبيت الامن والحفاظ على وحده الشعب ,ودمج قوات الثوار فى الجيش النظامى.. وعلى جميع الليبين من الشمال الى الجنوب ومن الشرق الى الغرب ان يتوحدوا فى سبيل اقامه دوله ديموقراطيه ذات سياده. ولكن كل هذا يتوقف على الوضع الامنى,ويعتبر هذا من اهم الملفات التى تواجه المجلس الانتقالى فى ليبيا.
_ويجب الاهتمام باعاده الامن والانضباط الى الشارع الليبى حتى يشعر المواطن بأنه آمن فى وطنه.
_ويجب ايضا اعاده بناء مؤسسات الدوله لانشاء ليبيا جديده.
_والسماح بأنشاء الاحزاب والمجالس التشريعيه لقيام دوله القانون.
_واعاده بنا ما هدم فى حرب الثمانيه شهور وانشاء بنيه اساسيه جديده تليق بأسم ليبا.
ويجب على كل القوى السياسيه معرفه الدور الذى ستفعله فى الحياه السياسيه حتى لا تحتاج الى مقوله "القذافى":"من انتم.!"
Egy-HAM.

الخميس، 20 أكتوبر، 2011


  • الوضع جميل انا متفائل
الجمله دى بسمعها فى اغنيه (يا هناه) لحمزه نمره,الكلمه دى بقيت اقولها عشان احس بشويه تفائل وامل فى الحياه..! بقيت اقولها لما تحصلى اى حاجه سواء وحشه او حلوه او سؤال غبى بيقابلى,كلام مش مفهوم,اى حاجه بتحصل فى مصر لما بشوفها بقيت بقول (الوضع جميل انا متفائل),,لما امشى فى الشارع واشوف اطفال الشوارع الى بتشتم وتشم "كله" بقول وانا ماشيه "الوضع جميل انا متفائل" اما اشوف البلطجيه والحراميه,اما اشوف الاعلام المصرى الرائع بتفائل جدا .!! بتفائل بالتحريض والكذب(الهجس) .بقول(الوضع جميل انا متفائل) لما اسمع عن مليارات (المخلوع)واولاده.بابتسم ابتسامه عريضه واقول(الوضع جميل انا متفائل),,لما افكر فى مستقبلى بعد ما اخلص مشوار تعليمى الثانوى بقول (الوضع جميل انا متفائل),,الخلاصه.ان الواحد لو بطل يتفائل من كتر الاحداث الى بدورحواليه هيموت مخنوق....
كلمه اخيره...الوضع جميل انا متفائله.
Amna.w.Hassan

الأربعاء، 19 أكتوبر، 2011

هل احنا شعب مش بنيجى غير بالضرب..؟!
فى البدايه كنت اسمع هذه العباره وانا فى ابتدائى كان يلقيها مدرس العلوم على الطلاب لمجرد انهم لم يعملوا الواجب..مكنتش بفهمها ,,او كنت بضحك كبقيه الطلبه..!لكن بصراحه ابتديت افهمها بجد لما كبرت وبقيت اشوف الى بيحصل فى الشعب,,وسألت سؤال واحد (هل احنا فعلا شعب مش بيجى غير بالضرب.؟)طيب ليه؟؟ليه الحكومه مش بتعامل الشعب معامله كريمه.!وابتديت اسأل من هم اكبر منى وكان اول واحد اسأله كان والدى الكريم,,قولت ليه كده.!قالى الحكومه مش بتعامل الشعب كبنى ادمين,استخدمت الشده عشان الشعب "غلبان" كل همه لقمه العيش..وضعتنى هذه الكلمات فى حيره اكبر.!!واسأل ناس تانيه ومعظم الناس كانت بتقول "المصريين متعودين على كده من ايام العثمانيون""دول حفروا قناه السويس بابضلا""ايه العجيب فى كده..!"لغايه لما حد قالى لا فرحت ساعتها جدا وكان ده مدرس الفلسفه بتاعى قالى كلمه"لقد خلقنا الله احرار"ابتسمت كده وقولتو دى كلمه (احمد عرابى)..!"قالى لما تيأسى من الاجابه افتكرى الكلمه دى وانتى مش هتتعبى".ساعتها ابتسمت ابتسامه عريضه وقولت "صح"ومن بعد الثوره وانا ماشيه بالمقوله دى وبقول ان العهد القديم  انتهى خلاص بالرغم من الى بيعمله المجلس العسكرى لكن هيجى وقته و ينتهى هو كمان.
Amna.w.Hassan