الثلاثاء، 10 فبراير، 2015

كيف تثق فى اساتذه الكليه ؟

فتره كبيره الواحد مكتبش حاجه ..ودا لعده اسباب مش لازم نتطرق اليها الصراحه....المهم ان الواحد رجع يكتب تانى وذلك بعد حاله الاستفزاز الى الواحد بيمر بيها خاصه بعد ظهور النتيجه وكده..المهم.

الموضوع مش نصايح ولا تعليمات على قد ما هو (تحذيراات)
اوعى تثق فى اى دكتور ف الكليه عندك اوعى..مهما لاقيته طيب اوى محترم او مثقف او بيضحك اوعى..التحليل النفسى الى حاولت اعمله ليهم ..انهم ف الاول و ف الاخر موظفين تبع الحكومه بيمشوا بتعليمات..الناس دى مرضى نفسين بمعنى الكلمه..ممكن ماينجحش طالب معين لمجرد انه ذكى حبتين او عنده موهبه ما..

صراحه انا مش بقول اى كلام..الحوار دا تاعب ناس كتير واشتكوا منه.
-ماتصدقش دكتور لما يقولو انا مديك درجات اعمال الينه كامله.
-ماتصدقش دكتور  لما يقول الى هايجاوب ع حاجه ليه درجتين عندى.
-ماتصدقش دكتور لما يحددلك حاجه معينه ويقولك هاتيجى ف الامتحان..مابيجيش حاجه.
-ماتصدقش دكتور لما يقولك ف اول السنه انه هايلغلى حاجه و اطمن وبتاع ماتصدقش دى بالذات.
النهايه.(ماتصدقش,,ماتحبش,,ماتثقش,,خليك قليل الادب بالزووق)
وشكرا...
Amna W,Hassan
tuen 10 february 2015


الأحد، 8 سبتمبر، 2013

زمآآن.


دايماً لما كنت بسمع جدودي بيحكو عن زمان وعن اختلاف الزمن دلوقتي وقبل كدا بسنين كنت بحب اقعد في وسطهم واسمع واتخيل كل حاجه بيقولها .. يعنى لما كانو بيحكو عن طيبه الناس زمان عن قله الكهرباء عن حياتهم من غير نت واجهزه حديثه عن هدوء الشوراع وخلوها من الزحمه .. عن ابتسامة اي شخص للتاني حتى لو ميعرفهوش عن سؤالهم عن بعض من غير ما يكونو عايزين من بعض حاجه عن تقديمهم الخدمات لبعض من غير مقابل او من غير مايكون فيه مصلحه .. عن لعب الولاد في الشوارع عن الابتسامه الي على وش الاطفال الي مش بتغيب عن اخلاقهم وعادتهم وادبهم وتصرفاتهم هو صحيح كان فيه ظلم وفقر بس كانو اسعد من دلوقتي بكتير .. هما كانو مبسوطيين اققل حاجه كانو مرتاحيين وبيضحكوا من قلبهم وكان عندهم الرجاله رجاله والستات ستات .. اخر الزمان هو زمنا دلوقتي .. وكل ما الزمن بيتقدم كل ما بنتقدم علميًا وبننزل اخلاقيا .. زمآن ! :’)

Amna W.Hassan

الثلاثاء، 25 يونيو، 2013

غريبه الاطـوار *قصه قصيره*

فتاه في عقدها الخامس عشر ، ذات بشرة سمراء ذهبيه وعينان واسعتان بنيتان اللون وابتسامه باهتهه ترسم على وجهها عند شروق شمس كل صباح جديد تعانقها نسمات الهواء لتنهض من فراشها وتصنع ضفيرتها السوداء المبعثره فتأخذ سلتها ونعليها وتخرج .. في طريقها يقذفها الناس بنظرات معقده لانهم ينعتونها بغربية الاطوار فتنظر الي محل قدميها وتكمل طريقها في نهاية الطريق بستان تملكه امراه عجوز هرمه تعطيها بعض الفواكه من بستانها كل يوم بالقرب منه فتيات من عمرها يلعبن بالورود بشعرهن المتناثر وضحكاتهن التي تلاحقها حتى في نومها .. اما هي فتجمع الفواكه لتعود فتهرسها فتبيعها ثم تعود لفراشها  تقول وسادتها الا يكفيني دموع اليوم السابق ! فتنام لتتكرر القصه من جديد .. 
Amna W. Hassan
25/6/2013

السبت، 2 مارس، 2013

انا عايزه اكتب...............

طيب انا عايزه اكتب واكتب حاجات كتير..ف دماغى حاجات كتير مكركبه ومحتاجه لترتيب..عايزه اكتب عشان الكتابه هى الى بتعبر عنى..بس يمكن اليومين دول عشان متلغبطه ف فا مش عارفه اعبر او مشغوله,,او يمكن مش مشغوله ومكسله..وبشغل نفسى بالفراغ!!! بس انا محتاجه اكتب..او يمكن بقيت بكسف اكتب..يمكن عشان عارفه ان محدش مهتم بالى بكتبه؟؟! طب مانا طول الوقت بكتب ومش بيهمنى حد ان كان مهتم ولا لا....كلها اعذار بحاول اخلقها لنفسى عشان تعطلنى عن الكتابه..بهرب من الكتابه بالقراءه..بس انا بمل من القراءه اوقات وعايزه اعمل مجهود وافكر اكتر ف الكتابه........
يمكن عشان انا مش عايزه ابقى مقيده بحاجه معينه..اكتب الى بيجيى على بالى !! اى كلام بقى والسلام..او ممكن قصص او شعر روش زى ما بسميه!!
او يمكن سينريوهات افلام...كبيره عليا شويه.......
يمكن ده الى مش مخلينى اكتب..فى افكار كتير عايزه اعبر عنها...طب مانا لو مكاتبتش مش هاعرف اعبر عن افكارى المكركبه دى!!!
يمكن عشان بكتب ع الوورد وانا عارفه ان ده شىء ممل...ممكن بردو..طب مانا بكتت ف الورق! ...
طب انا عارفه ان خطى وحش وساعات مش بعرف اقراءه لكن انا بحس بمتعه غريبه كده وانا بكتب بأيدى,,,حتى ولو بطيئه بس هو شىء ممتع!!
انا عايزه ابدا ف حاجه جديده اليومين دول وان شاءالله تكون ع الورق.....
والله الموفق والمستعان!
Amna W.Hassan
2/3/2013

الاثنين، 22 أكتوبر، 2012

سنه اولى جامعه.

ممكن انت تشوفها تدوينه تافهه..بس بالنسبه لى ممكن تبقى تدوينه تاريخ :) .. هتقولى تاريخ ازاى؟؟ هقولك لعده اسباب نبقى نكلم فيها بعدين ..بس يمكن اهم سبب ان انا كتبتها فى يوم الويلكم بارتى الى انا مروحتوش ! .......
المهم انا بعد فتره كبيره قضيتها فى التنسيق وصل بيا الحال انى ابقى فى كليه سياحه وفنادق و قسم ارشاد سياحى كمان " مع العلم انى محوله من كليه اداب وان كل ما اقول لحد كده بيسبلى :)" ما عليا, المهم ان انا دخلتها بعد صراع كبييير مع اختى الكبيره  واصحابها وبنت خالتى وبعد ما فضلوا يقنعونى انى هسافر بقى وكده,,وافقت بيها وبيقت طالبه كمان :D.
اول يوم دخلتها كنت عامله زى الى مسافر لبلد برا.. وكانت المفاجاه  انى اتقلبت  من واحد  ..ساعتها اخد الحوار هزار..وان ف تانى يوم ليا تخانقف مع بنت معايا ف القسم ولما دخلت ع المدرج اكتشفت ان نص العيال الى كانوا معايا ف الدروس من 3 اعدادى لحد تالته ثانوى معايا ف القسم -_-!!.
المهم اكتشفت انى بدرس "تاريخ ولغه هيروغليفى والاهم من كده آجماعه انى باخد أسبانى" يعنى بصراحه اكتشفت انى بدرس مواد انا بحبها ..وبصراحه ده يخلينى  احب دراستى مهما بقى كانت صعبه او سهله!
التجربه دى خليتى احب التعليم لاول مره  ف حياتى لان ببساطه حاجه انا حباها واخترتها بنفسى :).
وبقيت مع كل يوم الصبح اشوف اتخانق مع الراجل  الى ع البوابه "احب الكليه".
ومع كل تقليبه بتقلبها م الواد واشوف الكوتشى الدانك بتاعه "احب الكليه".
ومع كل محاضره جغرافيا م الدكتوره الى بتتسلق جبال ف بلغاريا "احب الكليه".
ومع كل مره ادخل مكتبه الكليه "احب الكليه".
ومع كل خناقه اتخانقها مع البنات الى من الشرقيه "احب الكليه" :)

ملحوظه:( ممكن للتدوينه دى يكون لها جزء تانى بس مش هكتب عليها جزى تانى).


Amna W.Hassan 

22//10/2012

الخميس، 26 يوليو، 2012

لماذا نعاقب.! سؤال انسان متشائم.

كثيرون يعيشون على الرغم منهم، إنهم يعيشون حياتهم كعقاب، إن الشيء الوحيد الذي يبقيهم أحياء هو السؤال التالي: لماذا نعاقب؟ ولأنهم يعوون خطورة السؤال ولمن يوجه السؤال، فهم يكتفون بأن يطرحوه سرا على أنفسهم ، هكذا يتحولون بالتدريج إلى مجرمين، يوقظون أنفسهم كل صباح ويجلدون أنفسهم بالحياة. 



Amna.W.Hassan
27/7/2012

الاثنين، 16 يوليو، 2012

يـــــــــــــــــوم النتيجه

يوم مهم فى حياه طلبه الثانويه العامه
اليوم ده مهم فى حياه قطاع كبير من الشعب المصرى.بيستنوه كده كأنهم بيستنوا الحلقه الاخيره من مسلسل فاطمه.! ,وده لان مش الطلبه بس الى بيستنوه ده كمان الاباء والامهات.!
النتيجه دى عامله زى المرض بالظبط,,يعنى ليها اعراض وليها نتائج كمان.!.مثلا زى ما بيجى للواحد دور برد وتلاقيه كده سخن وعمال بيخرف,,ولما بيخف تلاقى فى كده ولا مؤاخذه طفح على وشه من اثر السخونيه,النتيجه كمان كده ,تلاقى نفسك فى الاول متوتر وقلقان,ويا اما بتنام كتير او مش بتنام وعندك ارق,يا اما لامؤاخذه بتدخل الحمام كتير يا اما ولامؤاخذه عندك امساك ومش بتدخل الحمام,, يا اما قاعد مخنوق وبتخانق فى دبان وشك..وعايز تعمل خناقه مع اى حد,يا اما قاعد ساكت وملكش دعوه بالى بيحصل حواليك..!
نتيجه النتيجه"بالصلاه على النبى كده بتكون مرتبطه دائما بالشباك..! (واحد هيسألنى اشمعنا الشباك؟؟)
اقوله لانه رد الفعل الاوحد بعد ما الواحد بيسمع خبر النتيجه..! ازاى بردو؟؟!
1_لانك لو نجحت وجبت المجوع الى فى دماغك هطير من الفرحه وهترمى نفسك منه "lol"رخمه مش كده!
2_لو بقى مجبتش لا قدر الله مجموع حلو فا اتوماتيك كده هتترفع وهتتحدف من الشباك.
ولكن فى النهايه بنتمنى الخير لكل الى فى الثانويه لانى انا واحده منهم,وبطلب من الى خلصوا بقى انهم يكثفوا الدعوات بدل ماهما قاعدين كده...وشكرا. 
AmnaW.Hassan
monday16/7/2012

الأربعاء، 21 مارس، 2012

شهداء و يقولوا بلطجيه اة يا بلد مفتريه ( قصه شهيد ابكى مصر كلها) ماجد مدحت شهيد الاسماعيليه


بسم الله الرحمن الرحيم

(ولا تحسبن الذين قتلو فى سبيل الله امواتا بل احياء عند ربهم يرزقون ).   صدق الله العظيم                                                                                                                                 
                                  
الشهيد / ماجد مدحت محمود يوسف
العمر/ 15 عاما بالتحديد
محافظه / الاسماعيليه
المدرسه / امون عبد القادر
(هو احد الشهداء فى احداث الثوره ولكم ان تتخيلوا حياه ماجد المليئه بالاحداث برغم صغر سنه وندره شخصيته وان كان هو صاحب الخمسه عشر عاما فعلا ام هو شابا قد تجاوز العشرين من عمره ).
                                           و ذللك نقلا عن اخته/ نوران مدحت و اقرب افراد اسرته اليه
ماجد ابسط ان يكون هدوءا فى حداثة عمره , كثير الحركه حنون القلب مرى الخصال . كم كان هو الضحك التى يضاء بها منزل يتكون من اب و ام و ثلاثة ابناء كان اصغرهم (ماجد) , و لكم ان تتصوروا كم كان مدللا و برغم هذا الاهتمام الذى ذال يحظى به الصغار كان يظهر ماجد واي كانه رجلا يتناوب الحديث مع اقرانه الذين فى سنه برزانه و عقل و شخصيه قياديه , و الغريب ان اكثر الاصدقاء المقربون الى ماجد قد يتجاوزوا عمره و كان بقضى اكثر الوقت معهم فتعلم منهم كيف يكون كبيرا و هو الصغير و كيف يكون صغيرا بل اصغر .
يتحلى ماجد بكل هذه المتناقضات التى تملأ قلب من يسمع عن ماجد بالفضول من هو ماجد ؟ و كيف كانت ايامه ؟ و كيف يستطيع احد ان يملك حب الجميع ؟ فى هذا الوقت القصير الذى قضاه ماجد فى هذه الدنيا الذائفة .
وبدايه بأمه كان طيبا رقيقا برغم عنده وعصبيته المفرطه وكان ماجد يحنو الى امه كثيرا قد يكون ماجد محب للهو والمرح والمزاح ولكن ليس هو من الصعب السيطره عليه اى انه كما قلنا (صاحب العقلين ) الطفل الكبير , ومع اباه فهو المدلل الذى يجب ان تلبى رغباته التى تتحلى بالتميز عن الجميع اى انه كان مولعا ان يكون فريدا عن اقرانه يتميز حتى ولو كان فى العابه التى كان يجلبها , كان عنده المتحلى بالادب فعلا يعطيه كل الحق فى ان تلبى مطالبه .
اما اخوته فكان لهم الحظ الاوفر فيه شقيقه الاكبر محمد واخته كانو يروون فيه الصبا المتحايل على الزمن , ويقرأون فى عيناه الحلم الدفين فى قلب الاسره فكم كانت الضحكات لها وميض القمر فى لحظه البدر على قلوبهم , وكم تحسسوا منه العديد والعديد ن الاصرار والدءب والثأر من من قد يحاول ان ياتى عليه فهل رايتم او سمعتم عن حلم الحقيقه . (نعم ) حلم يطبق على الواقع فى لحظه الحلم به انه ياخذ ثأره من اخته بلمحه الاطفال المتخفيه وراء نومه فلم يكن منهم غير الدهشه مما يحدث  ...!! والمثير انه قد انها حلمه بمجرد انه انها لكماته الحنونه المستمره لاخته ماجد كان حنونا على اخته جدا كان قريبا منها مستمعا لها قد كان يمنع نفسه من قضاء وقت الفراغ مع اصحابه فى اللهو واللعب الذى كان يسيطر علىيه وعلى شخصيته وسنه الصغير على ان يثامر اخته نوران ويبقا معها وذلك بمجرد علمه انها سوف تبقا وحدها بالمنزل كان كثيرا ما تحب ان تعلمه بكثير من الاسرار وتقص له كل ما يحدث فى يومها فهى تجد فيه الصديق الناصح والاخ العاقل المتفهم والحبيب الغيور .  فقد كان غيورا جدا برغم صغر سنه
وكان  جدته التي كان يقيم عندها أغلب الوقت فهي كانت تجد فيه الونيس والجليس الذي  تحكي له وتحاول أن ترسم البهجة في عينيه بقدر أنها كانت متعبة جدا بحكم سنها الكبير كان متعلق بها ويحب أن يبقى معها وقت طويل حتى يغلبه النعاس وهكذا منذ حداثة  عمره
والأن الوقت مع ماجد الموهوب فعلا برغم بساطته التي نحكي عنها فقد كان متشعب الموهبة كثير التنقل معها فقد كان يجيد لعب كرة القدم وكثيرا  ما كان يتناوب على النوادي في الإسماعيلية ليلعب كرة القدم ولكن تشعب مواهبه وسنه المراهق كان يجعله غير ثابت على رياضة معينة والمثير للتساؤل أنه كان يجيد كل الرياضات التي إلتحق بها فهوا أحب السباحة ومارسها وأخيرا مر برياضة المصارعة الرومانية وهي كانت أخر ما مارسه من رياضات  .
ماجد وهبه الله صوت جميل رخيم يصل إلى القلب صائب المعنى فهو كان في غنائه يشدوا بأصعب المؤلفات الغنائية بصوت حاد النبرة تلمس فيه صغر سنه وتتحسس فيه أيضا جمال موهبته ، فالله الله عليه وهو يقرأ القرآن الكريم  فعلا ما أجمل القرأن وما أجمل صوتك يا ماجد .
يوم تلقي خبر إصابة ماجد ، كانت في وقت أحداث الشغب والإنفلات الأمني الذي عم البلاد بعد ثورة الخامس والعشرين من يناير ، كان في يوم 23/11/2011 م ليلا  وكان يوما حزينا على اهالى محافظه الاسماعيليه وليس فقط بل ارجاء مصر كلها فمصر كلها بكت وتأثرت لرحيل بطل شهيد عظيم هو ماجد مدحت محمود يوسف وودعته الاسماعيليه ومصر كلها فى يوم 24/11/2011 بدموع الحزن والاسى وكانت جنازته جنازه بطل عظيم فرحم الله الشهيد واسكنه فسيح جناته والهم اهله الصبر والسلوان . رحمك الله يا ماجد ........                                                                               

الأربعاء، 14 مارس، 2012

الاستقلال التام او الموت الزؤام"انا حقا اعترض".!

نظرتى اتغيرت تماما فى مسأله حبى للتاريخ..! والى حصلى ده من تجربه لمده سنه..كنت بحب التاريخ عشان كنت بقعد اقرأءه بمزاج كده وانا بشرب شاى او بيبسى كمان..مكنتش مطالبه انى احفظ حركات مقاومه او معاهدات او فرمانات ,او مؤتمرات صلح او ثوارات..بصراحه بعد مابدأت اخد درس تاريخ كنت حابه الفكره فى الاولى قولت تاريخ بقى واشطه.! وكانت البدايه بحضارات اليمن..بالرغم انها سهله فى الحفظ لكن لما تقعد تفكر كده مع نفسك تقول"انت بتدرس حضارات اليمن لييييييه.!هتعمل ايه بها يعنى.؟؟؟!" المهم الموضوع مشى تمام فجأه بقى لقيت نفسك بتدرس النظام المالى و الحضاره الاسلاميه..ده بقى كلام كبير جدا ولو محفظتش الى مكتوب فى الملزمه بالاسامى والتواريخ يبقى متحاولش تدخل امتحان التاريخ اخر السنه.!تدخل بقى على حملات صليبيه وكده.وتحب الكلام الى فيه والى هيساعدك على مذاكره الفصل ده فيلم"الناصر صلاح الدين"ليله الامتحان فى الدرس على الفصل ده كنت بتفرج على الفيلم (طول عمرى بحب احمد مظهر) :). وتلاقى نفسك دخلت على قطز والمغول وبيبرس وناس محترمه كده بتقول فى نفسك الكلام ده اخده فى العربى فى قصه و اسلاماه..مفيش اى مشكله..تلاقى نفسك مره واحده دخلت على محمد على..راجل محترم وتفرح بالحاجات الى هو عملها بس من كترها بعد كده هتشتمه عشان هتكون مجبر انك تذاكرها وتحفظها,,يجوا بقى عياله واحفاده يخربوا البلد ويعملولك مشاكل ديون بقى وكلام كبير برضه هتكون مجبر انك تذاكرها,,وعشان فى ديون لازم هتكون فى بريطانيا فى الموضوع,وعشان فى بريطانيا لازم هيكون ليها مستعمرات فى الهند ,,وعشان ليها مستعمرات فى الهند لازم تأمن طريق مواصلاتها وعشان تأمن طريق مواصلاتها لازم تدخل فى شئون ام الى جابتك "عفوا" ولما تدخل فى شئون ام الى جابتك "عفوا مره اخر" لازم يكون عندك مقاومه ولما يبقى فى مقاومه لازم يبقى فى (مصطفى كامل,محمد فريد,والكبير اوى سعد باشا زغلول يليه مصطفى النحاس ) و(الاستقلال التام او الموت الزؤام) وكله بالتفصيل الممل تفضل فى مقاومه ومعاهدات ومؤتمرات لغايه ثوره 23 يوليو 1952 ودى بقى الى هتدرسها بالتفصيل الممل من اول ما يصحوا من النوم لغايه لما السادات يطلع يعلن خبر الثوره.....! كل ده وانت شايل فى قلبك ومعبى وتقول بكره يخلص..لكن بقى الى ميتسكتش عليه انك تدرس احتلال وطرق مقاومه دول المغرب العربى "احييييييييييييييييييييه" اعمل انا ايه لما ادرس تاريخ الدول دى..تخرج من الحصه وانت مقهوور مقهوور وانت بتدعى على الدوله العثمانيه عشان هى السبب الكبير فى القرف ده..ماهى لو كانت بدافع عن الولايات بتاعتها كويس مكنتش "بريطانيا وفرنسا"طلعولنا فى البخت وبقى مجبر علينا نذاكر قرفهم مع الشعوب..امتى بقى هثور على كل ده واقول (الاستقلال التام او الموت الزؤام) اه اشمعنا انا..!!!! عايزه استقل من كل ده..بعد كل ده استمع الى نصيحه مدرسى العالمى فى الفلسفه وعلم النفس "مستر عمر سرور" (سيبى المعلومات تداعى فى ذهنك.المهم انك تبعبرى.!) وطبعا احب اوجه شكر كبيييييييييير اوى للعظيمه (مس فاتن) على المجهود الى بتعمله معانا.!.......بس خلاص!!!!
Amna.W.Hassan
15/3/2012